Avtoreferatda bir neçə dəfə
sürgün və deportasiyalara məruz
qalmış türk xalqlarından olan
axısqalıların dil xüsusiyyətləri
ümumiləşdirilmişdir. Avtoreferatla
tanışlıq göstərir ki, müəllif
Axısqa türklərinin dilinin təkcə
fonetik, leksik və qrammatik səviyyələrini
deyil, eyni zamanda həmin xalqın etnik tarixini,
mənşəyini, etnosiyasi və etnoçoğrafi
istiqamətlərini də tədqiqata
cəlb etmiş, dərin məzmunlu bir
əsər yazmışdır ki, bu
da digər azsaylı, haqsızlıqlarla
üzləşmiş kiçik xalqların
hərtərəfli öyrənilməsində
istifadə oluna bilər. İşin əsas
məzmunu 5 fəsildə öz əksini
tapmışdır: Axısqalıların
dil və etnik tarixi (I fəsil), Fonetika (II
fəsil), Leksika (III fəsil), Morfologiya (IV
fəsil) və Sintaksis (V fəsil).
I fəsildə Axısqa türklərinin
dil və etnik tarixi, müxtəlif türk
tayfalarının Axısqa toponimlərində
əksi, Axısqa türklərinin mənşəyi
məsələsi, bu əhalinin dilinin
tədqiqi tarixi öyrənilmişdir.
II fəsildə bu toplumun dilinin
fonetik qanunauyğunluqları (qədim səslərin
qalması, özünəməxsus səslər,
fonetik qanun və hadisələr, türkmənşəli
sözlərdə ahəng qanununun pozulma
səbəbləri, səs keçidlərində
spesifik əlamətlər, tayfa dilinin qalıqları
və s. ) tədqiq edilmişdir.
Dissertasiyanın III fəslində
bu etnosun dilinin əsas leksik fondu (s. 24) tematik
cəhətdən müvafiq bölgülər
(məişət leksikası, etnoqrafik
leksika, maddi-mədəniyyət leksikası,
terminoloji leksika və onomastik leksika) daxilində
şərh edilmişdir ki, bu da prinsipcə
düzgündür; leksik- terminoloji vahidlərin
təhlili prosesindəki ardıcıllıq
tamamilə gözlənilmişdir.
Əsərin IV və V fəsillərində
bu xalqın dilinin qrammatik və sintaktik xüsusiyyətləri
təhlil süzgəcindən keçirilmişdir.
Təhlil nəticəsində ən
çox qədim qrammatik faktlar aşkar edilmişdir
ki, bu da axısqalıların dilinin inkişaf
prosesinin ləng getdiyini təsdiqləyən
amillərdəndir.
Ümumiyyətlə, işin
avtoreferatı, onun müəllifinin böyük
zəhmət çəkdiyini, ciddi və
məsuliyyətli bir mövzunun öhdəsindən
layiqincə gəldiyini göstərir.
Ona görə də, biz, pedaqoq-tədqiqatçılar
bu avtoreferatın müəllifinə-filologiya
elmləri namizədi İ. Kazımova
filologiya elmləri doktoru alimlik dərəcəsinin
verilməsinin tərəfdarıyıq.
Naxçıvan
Pedaqoji Universitetinin alimləri:
YAVUZ AXUNDOV,
filologiya elmləri doktoru, professor.
ƏBÜLFƏZ
QULİYEV, filologiya elmləri namizədi,
dosent.
2
yanvar 2003-cü il