Nəcim ulu Tumasın sinəsində
dünyaya göz açıb, o, Tumas dağının
təmiz havasından udub, diş göynədən
suyundan içib. Tanrı gənc yaşından
ona istedad verib; nə qoşursa birbaşa
sinədən gəlir. Ona görə
də rəhmətlik Seyfəddin Əliyev
ona «Sinə» təxəllüsünü
vermişdir. Sovet dövründə Cəbrayılın
bütün kəndlərinin inkişafında,
dirçəlişində bir mexanizator
kimi Nəcimin zəhməti böyük
olmuşdur.
Nəcimin şer və poemaları
ilə tanışlıq məndə
belə bir fikir yaratdı ki, o, bir elin nəğməkarı
kimi «tikan üstə yatan şair»lərimizdəndir.
«Kim elədi ötən bu talanları?»
sualına cavab axtaran Nəcim Sinə narahat
dünyamızın ağrı-acılarından,
xüsusən də torpaqlarımızın
düşmən tapdağı altında
qalmasından həddən ziyadə əndişəlidir.
Elə Vətən, Torpaq, doğma el-oba
deyir, şerini hansı mövzuda yazırsa,
sonu bu müdirik kəlmələrlə
bitir. Həmin anlayışlar Nəcimin
yuxusuna tez-tez girir. Vətəndən əlini
üzmür, lakin davam edən süstlük,
düşmənə layiqincə cavab
verə bilməməyimiz Nəcimin inamını
qırır. Əvvəllər qail,
seyil, zail, cahil, mail olan Sinə başımıza
açılan bu bəlalardan sonra özü
dediyi kimi:
Ay Sinə! Qarabağ yaddan çıxanda
Dözməyib dərdinə,
şair olmuşam.
Vətənimi verən olsa
əlimə,
Onun ayağına düşüb
ağlaram və yaxud;
Atalar deyibdi, tökülən
dolmaz,
Varından pay verən, naumud
qalmaz
Anadan, torpaqdan pay vermək olmaz
Ürəyim od tutub yanar, ağlaram.
Düz deyirsən, Nəcim kişi,
Anadan, Torpaqdan pay olmaz. Ana da, Torpaq da bizim xalqımızın
başucalığı olmalıdır,
and yerimiz, qibləgahımız olmalıdır.
Nəcimin «Niyə ağlaram»
şerini bu baxımdan həyəcansız
oxumaq mümkün deyil. Şair Qarabağ
torpaqlarının düşmən çaynağına
keçməsində, ilk növbədə
özümüzü günahlandırır;
sapı özümüzdən olan baltaların
namərdliyini, satqınlığını
açıb göstərir:
Sapı bizdən olan, baltanın
özü,
Gördünmü çıxartdı,
«neçə min gözü»?
Düşmənə verildi,
Gəyənin düzü,
Ceyranları yada düşür,
ağlaram.
Puç oldu «ümidim»,
beş il cağbacağ.
İndi «tamam gedir» Vətən,
Qarabağ.
Nəcim Sinənin dərdi
köçkün dərdidir, özümüzə
ərkin dərdidir, dərdimizi dərkin
dərdidir, ən başlıcası
isə dünya boyda türkün dərdidir.Nəcim
bu dərdləri yaşaya- yaşaya:
Bu «yeni körpüdə
möhkəm olsa tağ»
Sevinər Nəcim, yenidən
Qarabağ. Və yaxud:
Ayıl, millət!Torpağını
özün al!
Gücü göstər, düşmənləri
başa sal;
Əbəcdaddan bizə qalıb
bu torpaq,
Şahiddi, həm tariximiz, bir
də haqq.
«Səbri gen» şair
Vətənin bütövlüyünü
arzulayır. «Taleh gözləməkdədir»
şerində özü-özünə
sual verir, bu suallarda yüksək insani keyfiyyətlər
ifadə olunur. Şair ədalətli
adamlardan umur, zəhməti itəndə
kədərlənir, ancaq ümidə
bel bağlayır, nişanlı qızların,
ağbirçək nənələrin,
oğul itirmiş anaların göz yaşlarını
görüb ürəyi sızlayır:
Arzu nə qədər çoxsa,
Taleh gözləməkdədir.
Nəcimin şerlərində
günümüzün reallıqları
(qaçqıqlıq, işsizlik,gün-güzəran,
xalqın ağır həyatı vədinə
xilaf çıxanların yalançılığı,
riyakarlığı, qəbirstanlıqda
torpaqların satılması və s.
problemlər) və bunları doğuran
səbəblər açılıb
göstərilir. Haqsızlıq, qohumbazlıq,
regionçuluq, ədalətsizlik, rüşvətxorluq,
məmurların özbaşınalığı
və s. bir bəla kimi qeyd olunur.
Dedim ki, gizlətmən dinsizləri
siz,
Bura onları siz gətiribsiniz.
Dedilər:» Ay xəsis,
bəs siz kimsiniz?»
«Qaçqın»- dedimə
bərkdən güldülər.
Nəcim, de ki, Vətənim
var, soyum var,
Bizdə buna həm hünər
var, cözüm var,
Heç gülməyin, alınacaq
torpaqlar-
İgid Nəbim, Həcərimə
güldülər.
Nəcimin bu şeri («Güldülər»)
M.Füzulinin «Şikayətnamə»sini
ideya- məzmun baxımından xatırladır.
Nəcim şerlərində
rüşvətxorluğun ifşasına
geniş yer ayırıb: «Keçmişdən
mirasdı», bax bu aqibət,
Xalqı qarət edib, «indiki
rüşvət».
Şair doğma Cəbrayılı
«qəhrəmanlar yurdu» adlandırır,
ulu elin igidləri, şəhidləri
ilə öyünür:
Gəzdim kainatı, olmadı
tayın,
Dünyaya çatıbdı,
əsrlik hayın,
Azalıb, düşmənlər
alacaq «payın»,
Çoxdu mərd övladın,
əmr ver «ayıl»!
Bu dardan qurtarsın, səni
Cəbrayıl!
Nəcimin şerlərində
yeni fikir, yeni söz deyimlərinə tez-
tez rast gəlmək olur.Hiss olunur ki, Nəcim
Sinə elin müdirik kəlamlarını
hələ kiçik yaşlarından
ata- babasından öyrənmişdir. Bunların
əksəriyyəti etnoqrafik səciyyəli
ifadələrdir. «Yüz t a p ı
n başını bir dərə kəsər»;
Düşmən girib ürəyimi t e
y l ə y i b; Güzəranlar günü-
gündən yey idi; Quyuda su yoxsa, tökməklə
dolmaz; Dünyadan sulu köçmək; -
üzü sulu; «torpaq götürməz
töhmət»; «qışdan yaza
çıxa bilməmək», «qaçqınlıq
donu biçmək», «üstünə
şələ düşmək»,
«düşmən dilini kəsmək»,
və s.
Şair bu gün dilimizin yad ünsürlərlə
həddən artıq yükləndiyinin
əleyhinə çıxış
edir. «Babalı öz boynuna» şeri
başdan- başa Azərbaycan dilinin təmizliyini,
saflığını tərənnüm
edir, bu yolda özümüzü, biz dilçiləri
də qınayır:
Bir çox «sözlər»
dilimizi edib «yad»
Bəs dilimiz kimdən gözləsin
imdad?
Vaxt gələcək, ediləcəkdi
«fəryad»
İnciyənin babalı öz
boynuna.
Şairin şerlərində
Gəyən düzü,Tumas, «Köhnə
qala», «Tumas ata», «İrəzgə»,
«Hacı Qaraman», «Başı
kəsik» künbəz, «Qurdlu quzey»,
«Üç təpə», «Sarı
yoxuş», «Dərə məhlən»,
«Dərə surçan», «Dul-dul»,
«Dizgə dağı», «Sulu
küfül», «Ballı qaya»,
«Söyüdlü», «Yel quyusu»,
«Divlər sarayı», «Çay
dərəsi», «Sal qaya», «Qurd
yolu», «Bazavız meşəsi»,
«Xanağa bulaq», «Qazan zəmi»,
«Böyük dağ», «Ocaq qala»,
«Ayaz görməz», «Ənsər
suyu», «Uzuncaqoşunlar», «Kordaş»,
«Qajırlı qaya», «Kəmərə»,
«Qamışca», Soltanlının
«İlanca», «Topçaq düzü»,
«Sulu Qobu», «Yantəpə»,
Qılıclı, «Yellicə»,
«Kəpirtəpə», «Qaşqamış»
«Diridağı», «Ağoğlan»,
«Dəlidağ», «Pəriçınqıl»,
«Ziyarətdağı», «Bazarçay»,
«Sorsor», «Üçağaç»,
«Kirs dağı» və s. təsvir
obyektinə çevrilmişdir. Bu toponmik
vahidlərin təsviri şairin el-oba adlarına
dərindən məhəbbət bəslədiyini
bir daha açıqlayır.
Şair Dağ Tumasın, Soltanlının,
Keçəl Məmmədlinin təbii
mənzərələrini, toponimik aləmini
vəsf etməkdən heç olmasa təskinlik
tapır:
Dolmuşam, yaza bilmirəm,
Qəribəm, dözə
bilmirəm
Sənsizəm, gəzə
bilmirəm,
Yıxıb qəmin, Tumas
sənin.
Vətənində vətənsiz
olan Nəcimin Vətən həsrətli
bayatılarında həsrətini, intizarını
çəkdiyi Cəbrayılın müqəddəs
ocaqları tərənnüm olunur:
Buludların indi batıb,
Çünki səni xain satıb,
«Köhnə qala»n çox
pis yatıb
Bəlan çoxdu, Tumas sənin.
Dünya ümidlə yeyilir,
Adım, səninlə deyilir,
Həsrətin belimi əyir,
Dərdin sənin, Tumas sənin.
Nəcimin bayatıları
«Yer-göyüm haray», «Vətən
dərdi çəkənlər»,
«Vətən sarı», «A
qaçqınlı günlərim»
başlıqları altında toplanmışdır.
Bu bayatılar Vətənin azadlığı
üçün elimizə-obamıza haray
çəkir, onları köməyə
səsləyir:
Nəcim, dedin mən varam,
Həm namısam, həm aram.
Səndə qisas qoymaram,
A qaçqınlı günlərim.
Səbir kasası dolan şairi
bu zəmanədə əsir torpaqları,
incik kəndi, «qaçqınlıq»,
«yardım» adları, cavabsız
suallar, ədalətsizlik vaxtından əvvəl
qocaldır; düşmənin yersiz kələyi
qarşısına aciz qaldığımızı
görüb heyfslənir, acı- acı
təəssüflənir:
Əyrini düz görən,
öz «özümdədi»,
Mənə xain olan «öz-özümdədi»,
Vədi yalan çıxan, öz
sözümdədi,
Onu siz qoymayın, qocaldır
məni!
Gör, nə böyük dağıq,
dözür səbrimiz.
Heyf Ana torpaq, heyf kəndimiz.
Yaxşı cəhətlərdən
biri Nəcimin ulu sənətkarlarımızı
yad etməsidir; Sabir, X.R.Ulutürk, qəzəlxan
Ə.Vahid («Sən ürəkdəsən»)
haqqında yazılmış poetik nümunələr
keçmiş irsimizə böyük etiramın
ifadəsi kimi səslənir. Nəcim
Sinə böyük satirik şairimiz Sabir
kimi yazır: düzü-düz, əyrini-əyri.
«Düzü-düz yazmasam, bil ki, məzaram»,
Özünə ustad seçdiyi X.R.Ulutürkə
həsr etdiyi «Yazmasam, məzaram»
şerində görkəmli azadlıq
carçısı ilə fikir və
məsləkcə birləşir; ölkənin
daxili «intizamından» yazır, münasibətini
bildirir.Şairin «Vətən yaxşıdı»
şerində yüksək mənəvi
keyfiyyətlər, «Qolum yanıma düşübdü»də
əlacsız bir şairin Vətən
dərdi; ağı qara edən zəmanə
ittiham olunur («Bizim zəmanə»).
Mən də günü keçmiş
yoxsul xocayam,
Vətəndən uzağa
düşmüş qocayam,
Orada «dam»idim, indi «baca»yam,
Bunu sən etmisən, bizim zəmanə.
Məlumdur ki, «baş bilənlər»
torpağın veriləcəyini qabaqcadan
bilib, xalqdan xəlvət, öz «var-dövlətlərini»
əvvəlcədən təhlükəsiz
yerlərə köçürüblər.
Nəcimin «Həyan olmadı»
şerində həmin məsələlərə
toxunulur:
«Duman, çən çiskinlə
gəldi üstümə,
Onun gəldiyini deyən olmadı.
Boğulurdum, bürünmüşdüm
tüstümə»
Hərə öz hayında,
görən olmadı.
«Cavabını bilmirəm»də
həyatı ümidlə yaşamaq eşqi,
«Ürək-dirək»də qəribçilik,
Vətənə dönmək arzusu(Vətən
üçün həyat boyu yanmalı);
«Vəfasız dünya»da sonu bilinməyən,
Süleymana qalmayan qəliz, zalım, qoca
dünyanın işləkləri; «Pis
nəzər, pis söz»də (Sinəyəm,
ilahamı aldım gözəldən,
Yaradan saxlasın, o bədnəzərdən);
«Bizim dağlar»da bizə quyu qazanlar,
Vətənə, onun dağlarına
qovuşmaq istəyi (Yol aç qucaqlaşaq
dağlar), şair dağlarla insanların
dərdini- sərini eyniləşdirir
(Biz səninlə bir dərdliyik, Biləsiniz
nə çəkirik); «Dinlə, gənc
əsgər»də gənclərə
nəsihət əsas yer tutur, toprağı
qorumağın sirrləri öyrədilir;
«Yadıma düşüb»də
sağlamlıq ocağı Cəbrayıl
elləri,_Hacı Qaraman, Mazan Nənə
ocaqlarının insana verdiyi xoş ovqat
tərənnüm olunur, «Lager»in
təmiz havası, «Ayı bulağı»nın
saf suyu yada düşür» (Aşıq
Ələsgərin qoşmalarını
xatırladır, elat, dağ, aran, üzlü
pendir, sapsarı yağ, motal tutma, «Oba»
yurdu). «Bihuş olaydım» şerinin
təsir gücü adamı mat qoyur, heyran
edir, arzudan istək doğar deyiblər,-
babalarımız, arzuların çin olsun
Nəcim kişi,bu arzu fərdi keyfiyyət
daşımır, bu arzu yer üzündə
öz əzəli torpaqlarına həsrət
qalan, bu bəlaları sadə xalqın
başına açan oyunbazlara, torpaq alverçilərinə
lənətlər oxuyur (Dağtumasda
daş olaydım; Kirs dağında qaş
olaydım; Hələ xeyir şəri
kəsir,Birlik yoxdu edə təsir,Torpaqlarım
qalıb əsir, Ağoğlanda «döş»
olaydım»; Ağlayanda yaş olaydım»,
«Qubadlıda qış olaydım»,»Kaş
bu anda quş olaydım»,Vətən
azad olan zaman,Kəsiləcək çoxlu
qurban,Sinə, onda «nuş «olaydım.
Arzuya bax, bu, ürəkdən gələn,
torpağa əzəldən bağlı
olan bir insanın ən ali arzularıdır.Kaş
o gün tez gəlsin, sən də, bütün
köçkün və qaçqınlarımız
da arzularına çatsın, Nəcim
kişi!!!.
Nəcimin şerlərində
xalqdan gələn ifadələr həddən
artıq çoxdur: «Hörmçəkdən
can almaq», «ley vuran kəklik tək»,
«ömrə möhtac olmaq», «baş
dəbərtmək» və s.
Nəcimin kitabda xeyli qoşması
toplanmışdır. Bu qoşmalar ənənəvi
olaraq saf və təmiz məhəbbəti
tərənnüm edir («Yara qurban»,
«Yar imiş», «Sevən mənəm»,
«İkimizindi», «Qarğış»,
«Sevgilim», «Hicran», «Ala
gözlər» və s.).
Nəcim Sinənin «Bu qaçqınlı
günlərim» kitabında bir sıra
poemaları da toplanmışdır. Yaşadığımız
dövrün təzadları, iqtidar-müxalifət
münasibətləri «Dünən
geri dönməyəcək» və
«Dövran qan ələyir» poemalarının
mövzusunu təşkil edir.
«Günahkar kimsə»
poemasında Böyük Vətən Müharibəsi
illərində baş vermiş qeyri-adi
hadisələr, müharibənin insan mənəviyyatına,
heysiyyətinə, əxlaqına vurduğu
yaralar və s. təsvir olunur.
«Kimdi şərbəndə?»
peması İran azərbaycanlıları
ilə bizim aramıza olan soyuqluq hisslərinin
tərənnümünə və eləcə
də düşmən toxumu səpənlərin
ifşasına həsr olunmuşdur:
Aramıza girən, bu qədər
şərin,
Günahı kimdəsə,
o şərbəndədi;
Əzəldən bir olub, ata-babamız,
Bir olub anamız, Vətən,
Qalamız
Bir-birinə can deyibdi balamız.
Sonrakı soy uqluq, görək
nədədi?
Günah kimdədirsə, o şərbəndədi.
Nəcim Sinənin şerlərində
bəzən dilin zəruri normaları
pozulsa da, fikir yeniliyi, ifadə gözəlliyi
onu üstələyir, ona görə də
biz onun şerlərinin dili, qrammatik norması
üzərində heç bir əməliyyat
aparmaq fikrində olmadıq; çünki
üsluba toxunmaq, bizcə, şeri alt-üst
edə bilərdi.
Türklərdə belə
bir kəlam var: Bizə də bir gün
doğar. Bu fikri Nəcim Sinə bu cür
poetikləşdirib:
Bu acılı günün sonu
bitəcək,
Üstən qara bulud uçub
itəcək.
Sinə qaçqınlarla kəndə
dönəcək,
Edəcək özünü
sipər Vətənə!
Biz inanırıq ki, tez bir zamanda
qaçqınlıq günlərinin sonu
olacaq, ağ günlər başlanacaq,
xalqımız öz doğma dədə-
baba torpaqlarına qayıdacaq, onda Nəcim
Sinə öz nəğmələrini
daha ağrılı-acılı, qəmli-
kədərli günlərə deyil,
xoş, firavan gələcəyə
oxuyacaq Bu yolda Nəcim kişiyə möhkəm
can sağlığı, dözüm
və dəyanət arzu edirəm.
İsmayıl KAZIMOV,
filologiya elmləri doktoru (Kitaba ön söz
- 23 yanvar 2003-cü il).