Dil sistemində söz
iki səviyyədə öyrənilir:
Məntiqi-semantik və struktur-qrammatik səviyyələrdə.
Axısqa türklərinin dilində sözün
morfoloji quruluşunun maddi göstəriciləri
öz həyatiliyini və özünəməxsusluğunu
mühafizə edib saxlamışdır.
Tədqiqat göstərir ki, morfoloji quruluşca
Axısqa türklərinin dili zəif inkişaf
etmişdir. Şəkilçilərin
birvariantda qalması, digər türk dillərində
olduğu kimi çoxvariantlılığa
meyl etməməsi bu baxımdan səciyyəvi
sayıla bilər. Birvariantlı şəkilçilər
bunlardır: -çi,- ci,- li, -lux və s.
Axısqa türklərinin
dilində çox zaman -çi şəkilçisi
əvəzinə -ci şəkilçisi
işlənir. Məsələn: Biz quş
idux uçaridux havada,\\ Avci vurdu düşürtdilər
yuvadan (Folklor nümunəsi).
Müasir Azərbaycan
dilində dörd variantda işlənən
-lıq şəkilçisi Axısqa dilində
yalnız birvariantlıdır (-lux): Nə
aylux var, nə illux var əsgərə,\\Səfərbərlux
bizə verməz təzkirə (türkü);
Vətənsizlux böyük dərddir bilənə
(İlyas İdrisov).
-lux şəkilçisi
qohumluq terminlərinə əlavə olunaraq
ögey qohumluq mənasını ifadə
edən isimlər əmələ gətirir:
analux, babalux, bacilux və s.
-lux şəkilçisi
- gil şəkilçisinin funksiyasını
yerinə yetirir: bacilux (bacigil), kardaşlux
(kardaşgil) və s.
-lux//nux şəkilçisi
adlara qoşularaq keyfiyyət, xasiyyət,
peşə, hal-vəziyyət, yer və
əşya bildirən isimlər əmələ
gətirir: Tağın üstündə
düzənnux da bir göl var. Yazluxda padişah
vəzir-vəkilinən bekliyer ("Şah
Abbasinən usta" nağılından);
Ləncpərluxda yox barabari (S.Bayraqdarova) və
s.
-çax şəkilçisi:
qabçax (tas), yançax, qolçax, sarımçax
və s.
Azərbaycan dilinin dialektlərində
(Zəngilan, Bakı, Salyan) həmin şəkilçiyə
bu və ya digər fonetik variantlarda təsadüf
olunur [12, s. 174; 64, s. 110].
-ğac şəkilçisi:
tutğac (əlcək), yaslanğaç
(yastıq) və s.
-çuk şəkilçisi:
qolçuk (Ol yanma, sol yanıma, gəl otur
yanıma, Nazik de nazik qolçukların sarçi
də boynuma).
-cux şəkilçisi:
boncux, qızılcux və s.
-ciy şəkilçisi:
məniciy, yabanciy, anaciy və s.
-çə şəkilçisi:
kəpçə, çömçə
və s.
-mac şəkilçisi:
tutmac, bazlamac. "Bazlamac" sözünə
"Kitabi-Dədə Qorqud"da da rast gəlirik:
... Əlin-yüzün yumadan toquz bazlamac ilən
bir küvlək yoğurd gəvəzlər
[38, s. 99].
Azərbaycan dilinin qədim
dövrlərində bu şəkilçi
ilə bulamac, bozlamac, dökməc, tutmac,
kəsməc kimi xörək adları
düzəldilmişdir.
-lux (nux) şəkilçisi
bu əhalinin dilində kəmiyyət kateqoriyasının
maddi göstəricisi kimi də çıxış
edir. Bu əlamət həmin dili digər
türk dillərindən fərqləndirir.
Məsələn: Onnux (onlar) hönkür-hönkür
ağladi. Tavarluği (davarları) çöllərə
haydalasana, kız! Adamlux (adamlar) dad-fəryad
qopardi və s.
Birvariantlı -li şəkilçisi:
Qarli-buzli dağlar haxlıma gəldi (İlim
Şahzadayev).
- li şəkilçisi
ni şəklində də adi danışıq
dilində işlənir:
Toromannilər çarşi
- bazarda eydir (nağıllardan/
Söz köklərində
"i"-ləşmə hadisəsi zəif
şəkilçiləşmənin
təzahürüdür: qoxi (Kərənfil
qoxi neynar); qapi (Dar günündə qapin açan
oldumi) və s. Bu hadisə, yəni ı,u,ü
saitlərinin yerinə "i"-nin işlənməsi
ahəng qanununun pozulmasına gətirib çıxarır.
Bəzi söz köklərində
də inkişafın ləng getdiyi müşahidə
olunur. Məsələn: "tü"
sözü ən qədim köklərdəndir.
Bu sözün sonrakı inkişafı aşağıdakı
kimi olmuşdur: tü- tüü - tüy -
tüq - tük. Axısqa türklərinin
dilində bu söz "tüy" formasında
qalmış, daha inkişaf etməmişdir
(Tauxun kandında tüy vardı - nağıllardan).
Dilin inkişafı
analitik formaların öz yerini sintetik formalara
verilməsi ilə də səciyyələnir.
Lakin bu əhalinin dilində sintetizmə
meyl zəif olduğundan analitik formalar hələ
də saxlanılmışdır: bənə
qalsa, sana qalsa (məncə, səncə).
-duc şəkilçisi:
sağduc, solduc: Aşıq sözüni
başlasın,\\ Düşmənlər
işini boşlasin,\\ Mövlan sizi çift
saxlasin,\\ Ağa güvəgi, bəg sağduci
(Qəribəm bu vətəndə, 73).
-ma şəkilçisi:
atma, basdurma, buğlama, bozlama, sovutma, kavurma,
çixirtma, kazma, sırma, kovrama və s.
-ıx şəkilçisi:
anıx (anıxlamax - toy gününü
bəlli etmək).
-ğun şəkilçisi:
burğun, vurğun.
Üç yigit bənə
vurğun (mani).
-gək şəkilçisi:
süzgək (süzgəc), ilgək.
-gənc şəkilçisi:
yüzgənc (üzmək).
-çax şəkilçisi:
burçax (əmək aləti).
-a şəkilçisi:
çapca (Sapanla çapa dünyaya bəslər
- əski söz).
-qax şəkilçisi:
oturqax (oturqax mindəri). İndi müasir
Azərbaycan dilində arxaikləşmiş
- qax şəkilçisinin aq,- qa kimi derivatları
mövcuddur, "oturqax" sözü isə
bizim dilimizdə "otaq" şəklində
daşlaşmışdır.
Asemantik şəkilçilərin
qalıqları sözün tərkibində
açıq-aşkar hiss olunur. Məsələn:
köçməkcilux - köçkünlük
mənasında: Çünki bizim millətə
köçməkçilux yazılmışdır
(İ.Səfil); Yanğılış
- yanlış mənasında: Yanğılış
və əgri yola düşənləri
naletliyerim (G.Şahin).
- lük şəkilçisi
baxmayaraq ki, qədim xüsusiyyətə
malikdir, bununla belə, "bu böyüklük
hökümət" ismi söz birləşməsindəki
"böyük" sözünün tərkibində
asemantikdir.
- lux şəkilçisi
"dağlux havası" ismi birləşməsinin
birinci tərəfində lüzumsuz yerə
işlədilmişdir. Dağlux havası
yaradur\\ Dağlar bənim yürəgimdə
(c.Xalidov).
Axısqa türklərinin
dilində də ikiqat mənsubiyyət
şəkilçisinin "si" hissəsi
sözdə artıqlıq yaradır: Millətin
çoxusi dərdli\\ Dərddən beli iki
qatli (Yitgin Qomoroli). Azərbaycan dilinin keçid
şivələrində bu xüsusiyyətə
rast gəlmək olur. Məs.: kolxoz sədrisi,
kənd müəlliməsi və s.