Türk dillərinin
fonetik sistemi həmişə sabit qalma əlamətləri
ilə xarakterizə edilir. Fonetik sistem uzun
illərin, əsrlərin məhsuludur,
əsrlər boyu öz sabitliyini qoruyub saxlaya
bilmiş, əsaslı dəyişikliyə
uğramamışdır. "Tarixi şərait,
coğrafi və ictimai mühit, xalqın
məskunlaşdığı yer, ərazicə
qonşu xalqların öz ictimai-mədəni
və sosial-iqtisadi inkişafı kimi amillər"
şübhəsiz ki, axısqalıların
da dilinin səs sistemi və fonetik qanun və
hadisələrin yaranmasına təsir
göstərmişdir.
Həsənov Həsrət.
Azərbaycan dilinin fonetikası. B., 1999, s.12.
Axısqa türkləri
Gürcüstanda yaşayarkən gürcü
əlifbasından, Qazaxıstanda, Azərbaycanda,
Özbəgistanda və Rusiyanın digər
bölgələrində isə rus qrafikalı
əlifbadan istifadə etmişlər. Qeyd
edilən əlifbalar həmin əhalinin
mədəni həyatında bu və
ya digər dərəcədə rol oynamışdır.
Gürcü əlifbası ilə onların
qəzetləri nəşr edilmiş,
teatr əsərləri yazılmış,
folklor nümunələri qeydə alınmışdır.
30-cu illərdə Axısqa bölgəsində
"Ədigön kolxozçusi", "Qızıl
rəncbər" və s. yerli qəzetlər
bu əlifbada nəşr edilmişdir.
Gürcüstanda sovet
hökuməti qurulana qədər Axısqa
türkləri öz dillərində yazıb-oxumuş,
1924-cü ildən sonra türk dilində olan
məktəblər bağlanmışdır.
Ə.Ənsarov "Ahısqa türkləri"
adlı kitabçasında bu haqda yazır:
"Uşaqlarımız doğma ana dilində
təhsil ala bilmədilər. Axısqa
türklərinə uşaqlarını
gürcü dilində oxumağı təklif
etdilər. Gürcü dilini uşaqlar bilmirdilər.
Axısqa türklərinin əsl faciələrindən
biri elə bu vaxt başladı. Bir xalqın
övladları ana dilində təhsil ala
bilməyib gürcü, rus dillərində
oxumağa getdilər. Bu da uşaqların
milli zəmindən tədricən uzaqlaşmasına
gətirib çıxarırdı"
[24, s. 6].
Sovet dönəmində
onlar rus qrafikalı əlifbadan istifadə
etmişlər. "Mesxeti Türklərinin
Ümumittifaq "Vətən" cəmiyyətinin
Orqanı" olan "Vətən eşqi"
adlı qəzet bu əlifba ilə əvvəlcə
Kabardin-Balkar bölgəsinin Urvan rayonunda rus
və milli dildə, sonra isə Saatlı
rayonunun Fətəlikənd kəndində
(1991-ci ilin mart ayından) öz dillərində
və Azərbaycan dilində çap olunmağa
başlanmışdır. Qəzetin çapında
A.Pepenovun, A.Kadırovun, S.cəlilovun, G.Şahinin
və başqalarının böyük
əməyi olmuşdur.
Bu dilin fonetik xüsusiyyətləri,
ilk növbədə, gürcü alimlərinin
diqqətini cəlb etmişdir. N.Marr bu dilin
fonetik quruluşu ilə bağlı bəzi
xarakterik xüsusiyyətləri göstərmişdir
[137, s. 27]. S.cəlilov həmin dilin fonetikasına
dair namizədlik dissertasiyası yazmışdır.
Ancaq dissertasiya müdafiə olunmamış
və nəticələri də heç
bir yerdə çap edilməmişdir. F.F.Əliyev
"Oçerki po leksike əzıka turok Kazaxstana"
əsərinin müvafiq bölmələrində
türklərin dilinin fonetik xüsusiyyətlərindən
də bəhs etmişdir [78, s. 8-10].
Bütün bunlara baxmayaraq,
həmin dilin fonetik sistemində öyrənilməyə
ehtiyacı olan məsələlər
çoxdur və onları araşdırmağa
çalışmışıq.
|